Ágúst: Varnarleikurinn varð okkur að falli

„Þetta eru gríðarleg vonbrigði," sagði Ágúst Björgvinsson, þjálfari Hamars eftir að liðið tapaði fyrir Njarðvík á heimavelli, 76-74, og féll úr keppni um Íslandsmeistaratitilinn í Iceland Express deild kvenna.

„Varnarleikurinn var ekki nógu góður og við vorum að fá á okkur allt of auðveldar körfur. Það verður okkur að falli í kvöld. Við vorum að skora minna en við höfum verið að gera en það er fyrst og fremst vörnin sem fór með þetta hjá okkur."

Hamar varð deildarmeistari fyrir skömmu og flestir áttu von á því að liðið færi í úrslitaleikinn. Njarðvík kom honum ekki á óvart í leiknum. „Þær komu okkur ekki á óvart. Liðið er með gríðarlega sterka erlenda leikmenn og íslensku stelpurnar léku vel í dag. Leikgleðin virtist vera meiri þeirra megin í kvöld. Ég gæti vafalaust komið með einhverjar afsakanir hvers vegna við töpuðum en sú einfalda er að Njarðvík lék einfaldlega betur."

Ágúst hefur þjálfað bæði karla- og kvennalið Hamars í vetur. Hefur hann hug á að halda áfram? „Það er allt óljóst í þessum efnum og ég mun setjast niður með forráðamönnum Hamars of fara yfir stöðuna. Ég er opinn fyrir öllu."