Hverfafundum borgarstjóra frestað

Hanna Birna Kristjánsdóttir borgarstjóri ætlar ekki að halda fyrirhugaða hverfafundi með íbúum Reykjavíkur. Hins vegar stendur til að halda þá síðar á árinu, eftir kosningarnar.

„Borgarstjóra þykir ekki rétt að efna til þessara funda á kostnað borgarinnar þegar svo stutt er í kosningar," segir Magnús Þór Gylfason, aðstoðarmaður borgarstjóra. Hins vegar muni hún sjálf halda fundi í hverfum borgarinnar í kosningabaráttunni fram undan og þá á kostnað Sjálfstæðisflokksins. Samkvæmt heimildum blaðsins hefur fundaherferð af þessu tagi kostað borgina allt að fimm milljónum króna.

Dagur B. Eggertsson, fulltrúi Samfylkingar, segir þetta koma mjög á óvart, enda búið að senda tölvupóst víða til að kynna þessa fundi. „Ég man ekki eftir því að borgarstjóri héldi ekki svona fundi, því það hefur verið litið á þetta sem eðlilegan hluta af starfi borgarstjóra, að vera aðgengilegur fyrir borgarbúa. Þannig hefur þetta verið þar til fyrir tveimur árum," segir hann.

- kóþ