Frakkar: Aldrei sótt um leyfi fyrir Icesave í Frakklandi

12. febrúar 2010 09:37

Talsmaður seðlabanka Frakkalands (Banque de France) segir að aldrei hafi verið sótt um leyfi til að starfrækja Icesave-reikninga þar í landi. Þetta stangast á við orð Björgvins G. Sigurðssonar fyrrverandi viðskiptaráðherra um að Frakkar hefðu neitað Landsbankanum um slíkt leyfi.

Fjallað er um málið í hollenskum fjölmiðlum þar á meðal vefsíðu De Verdieping Trouw. Þar er haft eftir talsmanni Banque de France að ekki hafi verið sótt um leyfi fyrir Icesave og slíkri beiðni því ekki verið hafnað.

Vefsíðan segir þessi orð athyglisverð í ljósi yfirlýsinga Björgvins í blaðinu De Volkskrant þar sem hann hélt því fram að frönsk stjórnvöld hefðu vitað að ríkisábyrgð var ekki að baki Icesave og því hefðu þau hafnað slíkum reikningum þar í landi. Björgvin notaði þetta síðan sem rök gegn málflutningi Nout Wellink seðlabankastjóra Hollands.

Eins og áður hefur komið fram hefuir Wellink ásakað stjórnvöld á Íslandi um að hafa logið að hollenskum stjórnvöldum um stöðu Landsbankans og raunar íslenska bankakerfisins í heild. Björgvin aftur á móti sagði að þau orð væru gróf mistúlkun á raunveruleikanum.

Í öðrum miðlum er greint frá því að Wouter Bos fjármálaráðherra Hollands hafi fyrirskipað rannsókn á ummælum Wellink um lygar íslenskra stjórnvalda skömmu fyrir bankahrunið 2008.