Ferguson: Hargreaves spilar aftur fyrir Manchester United á tímabilinu

Owen Hargreaves verður ekki með Manchester United í Meistaradeildinni í ár þar sem Sir Alex Ferguson, stjóri liðsins, ákvað að hafa hann ekki á 25 manna leikmannalista liðsins. Ferguson segir þó að enski landliðsmiðjumaðurinn muni spila fyrir Manchester United á tímabilinu.

Owen Hargreaves hefur ekki getað spilað með United síðan í september 2008 þegar hann ákvað að fara í nýstárlega aðgerð á hné vegna þráðlátra meiðsla frá tíma hans hjá Bayern Munchen.

Bati Hargreaves hefur hinsvegar verið hægur og ekkert varð af því að hann kæmi til baka í nóvember eins og stefnt var á.

„Það gengur hægt hjá Owen að koma til baka. Nú er liðið eitt og hálft ár og við sjáum engan endapunkt ennþá. Hann mun samt koma til baka og ég er viss um að hann geti hjálpað okkur í deildinni. Vonandi getur hann það," sagði Sir Alex Ferguson og bætti við:

„Það eru fleiri deildarleikir en Evrópuleikir og ég þarf ekki að skrá hann inn í ensku deildina," útskýrði Ferguson.