Robben vill mæta Mourinho í úrslitaleiknum

Arjen Robben, leikmaður FC Bayern, vill mæta sínum gamla lærimeistara, Jose Mourinho, þjálfara Inter, í úrslitum Meistaradeildar Evrópu.

Bayern tryggði sér farseðilinn þangað í kvöld með 0-3 sigri á Lyon og annað kvöld kemur í ljós hvort liðið mætir Inter eða Barcelona í úrslitaleiknum.

„Ég vil klárlega spila gegn Inter í úrslitaleiknum. Það hentar okkur betur, við myndum lenda í meiri vandræðum gegn Barca. Ég vil líka mæta Inter þar sem ég myndi þá mæta Mourinho og Sneijder," sagði Robben sem lék í þrjú ár undir stjórn Mourinho hjá Chelsea.

„Þetta var annars mjög þægilegur sigur. Við vorum miklu betra liðið á vellinum og spiluðum frábærlega. Við sátum ekki til baka og biðum eftir þeim heldur vorum við grimmir og spiluðum sóknarbolta. Ég er mjög stoltur af liðinu og það er magnað afrek að vera komnir í úrslit."