Annasamur vinnudagur hjá Almunia

„Ég hef aldrei haft svona mikið að gera í leik með Arsenal," segir markvörðurinn Manuel Almunia sem hafði nóg að gera í vinnunni í gær þegar Arsenal tók á móti Barcelona.

„Þeir sköpuðu fjölmörg færi en við sýndum karakter og börðumst vel fyrir því að koma til baka," segir Almunia en leikurinn endaði með jafntefli 2-2 eins og flestir vita.

Hann telur að Arsenal þurfi að vinna þá leiki sína sem eftir eru í ensku úrvalsdeildinni til að standa uppi sem sigurvegari á þeim vígstöðvum. „Við þurfum að treysta á að Manchester United tapi stigum. Við eigum allavega möguleika á titlinum. Við eigum sex leiki eftir og við þurfum að vinna sex leiki," segir Almunia.