Van Gaal: Mourinho var einu sinni hógvær

Hinn hollenski þjálfari FC Bayern, Louis Van Gaal, segist eiga örlítið í José Mourinho, þjálfara Inter, en þeir tveir mætast með lið sín á laugardag í úrslitum Meistaradeildar Evrópu.

Þeir félagar unnu saman á sínum tíma hjá Barcelona og Van Gaal hrósar Portúgalanum í hástert.

„José var mjög hógvær á þessum tíma. Það hefur verið ánægjulegt að fylgjast með honum vaxa og dafna og verða að þessum frábæra þjálfara sem hann er. Það er líka gaman að sjá hvað hann er sterkur persónuleiki," sagði Van Gaal.

„Ég vissi alltaf að hann myndi reynast mér vel. Hann var svo kappsfullur og tók fljótlega eftir því að ég gerði hann að betri þjálfara. Ég tel mig hafa kennt honum ýmislegt og ég sá strax að hann hafði mikinn skilning á leiknum," sagði Hollendingurinn en hver er munurinn á þeim tveimur?

„Hann þjálfar til að vinna. Ég þjálfa til að láta mín lið spila fallegan fótbolta og vinna. Mín leið er erfiðari."