Sneijder: Draumur að rætast

Hollendingurinn Wesley Sneijder var ekki áberandi í liði Inter í kvöld enda spilaði liðið eingöngu varnarleik. Hann var afar kátur eftir leikinn og bíður spenntur eftir að komast á Santiago Bernabeau þar sem úrslitaleikurinn fer fram en þar lék hann með Real Madrid áður en hann fór til Inter.

„Það var svo sannarlega draumur að rætast í kvöld. Það er draumur allra leikmanna að komast að minnsta kosti einu sinni í þennan úrslitaleik. Við erum komnir þangað og ætlum að njóta þess," sagði Sneijder brosandi.

„Við verðum líka að njóta þessa augnabliks því síðan þurfum við líka að hugsa um deildina heima. Við höldum samt smá teiti fyrst," sagði Sneijder sem hefur verið frábær í liði Inter í vetur.

„Ég held að þetta sé mitt besta tímabil."