Lampard leikfær hjá Chelsea - Zhirkov er meiddur

Lundúnafélagið Chelsea ferðaðist til Mílanó í dag en liðið mætir sem kunnugt er Inter í fyrri leik liðanna í 16-liða úrslitum Meistaradeildarinnar á San Siro-leikvanginum annað kvöld.

Knattspyrnustjórinn Carlo Ancelotti gat glaðst yfir því að Frank Lampard hefur jafnað sig á þeim meiðslum sem héldu honum frá sigurleiknum gegn Woves um helgina.

Þá munu varnarmennirnir Juliano Belletti og Alex einnig vera klárir í slaginn á nýjan leik eftir meiðsli en Ancelotti á hins vegar í miklum vandræðum með vinstri bakvarðastöðuna.

Yuri Zhirkov átti að leysa hinn meidda Ashley Cole af hólmi en hann meiddist sjálfur um helgina og ferðaðist ekki með liðinu til Ítalíu.

Þá er bakvörðurinn Paulo Ferreira ekki einu sinni í leikmannahópi Chelsea í Meistaradeildinni og því spurning hver verður fyrir valinu en Belletti verður að öllum líkindum kallaður strax inn í byrjunarliðið.