Segir FIH starfsmenn ekki í vandræðum með aðra vinnu

Lars Johansen bankastjóri FIH bankans í Danmörku segir að þeir starfsmenn sem sagt var upp í dag muni ekki eiga í vandaræðum með að fá aðra vinnu. "Það er mikil eftirspurn eftir starfsmönnum bankans," segir Johansen í samtali við börsen.dk.

Eins og fréttastofan greindi frá þann 11. janúar s.l. ákvað stjórn FIH bankans, sem nú er í eigu íslenska ríkisins, að segja upp 100 starfsmanna sinna og leggja niður hlutabréfadeild bankans í hagræðingarskyni.

FIH komst í eigu íslenska ríkisins þegar Seðlabankinn veitti Kaupþingi 500 milljóna evra lán korteri fyrir hrun Kaupþings en lánið var með allsherjarveði í FIH bankanum.

Það hefur vakið athygli að Seðlabankinn telur þetta veð með í gjaldeyrisforða sínum þótt að síðasta verðmat á FIH sem JPMorgan setti fram er aðeins helmingur af upphæðinni eða um 250 milljónir evra.

En Johansen hefur sum sé ekki áhyggjur af framtíð þeirra 100 starfsmanna sem fengu uppsagnarbréf sín í dag. Uppsagnarfresturinn er mismunandi langur eða frá þremur mánuðum og upp í ár.