Umfjöllun: Naumur sigur Breiðabliks í bikarnum

Breiðablik vann heldur nauman 2-1 sigur á Þór/KA í fjórðungsúrslitum VISA-bikarkeppni kvenna í spennandi leik. Þrívegis hafnaði boltinn í stöng eða slá, þar af tvisvar eftir skot gestanna.

Blikar komust þó í 2-0 í leiknum. Fyrst skoraði Berglind Björg Þorvaldsdóttir strax á fyrstu mínútu og svo Harpa Þorsteinsdóttir á 66. mínútu. Bojana Besic minnkaði muninn fyrir Þór/KA með marki úr vítaspyrnu undir lok leiksins.

Fyrsta mark leiksins kom eftir aðeins 29 sekúndna leik. Harpa Þorsteinsdóttir gaf góða sendingu á Berglindi Björgu sem afgreiddi knöttinn í netið með laglegu skoti á vítateigslínunni.

Þór/KA vann 2-0 sigur á Breiðabliki í deildinni á föstudaginn síðastliðinn og tók það því síðarnefnda liðið ekki langan tíma að byrja að hefna ófaranna.

Blikar byrjuðu mun betur í leiknum og var Harpa næstum sloppin ein í gegn eftir sjö mínútna leik en Berglind Magnúsdóttir, markvörður Þór/KA, var fyrri til að grípa til knattarins.

Besta færi Þór/KA í fyrri hálfleik fékk Bojana Besic á 23. mínútu er hún átti hörkuskot af löngu færi úr aukaspyrnu sem hafnaði í þverslá Blikamarksins.

Nokkuð jafnræði var með liðunum í fyrri hálfleik eftir þetta. Blikar voru þó meira með boltann en gekk illa að skapa sér hættuleg færi. Þór/KA náði svo að ógna nokkrum sinnum eftir skyndisóknir.

Það sama var upp á teningnum lengst af í síðari hálfleik. Blikar voru meira með boltann en öðru sinni komust gestirnir nálægt því að jafna metin. Í þetta sinn var það Mateja Zver sem átti gott skot að marki á 49. mínútu en nú hafnaði það í stönginni.

Á 64. mínútu voru það Blikar sem áttu marktilraun sem hafnaði í markrammanum. Erna Björk Sigurðardóttir átti þá skalla í slá eftir hornspyrnu.

Aðeins tveimur mínútum síðar náðu Blikar að tvöfalda forystuna. Fanndís Friðriksdóttir vann boltann af varnarmanni og gaf fyrir þar sem Harpa var á réttum stað og stýrði knettinum í netið af stuttu færi.

Um tíu mínútum síðar þurfti Fanndís að fara af velli vegna meiðsla og virtist nokkuð þjáð.

Eina mark Þór/KA kom á 82. mínútu. Mateja Zver var þá við það að sleppa í gegnum vörn Blika en Guðrún Erla Hilmarsdóttir var dæmd brotleg og víti dæmt. Umdeildur dómur en Besic skoraði af öryggi úr vítinu.

Gestirnir náðu lítið að ógna marki Blika eftir þetta sem gátu því fagnað góðum 2-1 sigri og sæti í undanúrslitum bikarsins.

Breiðablik - Þór/KA 2-1

1-0 Berglind Björg Þorvaldsdóttir (1.)

2-0 Harpa Þorsteinsdóttir (66.)

2-1 Bojana Besic (82.)

Kópavogsvöllur. Áhorfendur: Óuppgefið.

Dómari: Hákon Þorsteinsson

Skot (á mark): 13-9 (6-4)

Varin skot: Elsa Hlín 1 - Berglind 3.

Horn: 5-2

Aukaspyrnur fengnar: 13-14

Rangstöður: 2-0

Breiðablik (4-4-2):

Elsa Hlín Einarsdóttir

Guðrún Erla Hilmarsdóttir

Anna Birna Þorvarðardóttir

Erna Björk Sigurðardóttir

Hekla Pálmadóttir

Fanndís Friðriksdóttir (gult, 49.)

(78. Ásta Einarsdóttir)

Sara Björk Gunnarsdóttir

Hlín Gunnlaugsdóttir

Sandra Sif Magnúsdóttir

Harpa Þorsteinsdóttir

Berglind Björg Þorvaldsdóttir



Þór/KA (4-3-3):

Berglind Magnúsdóttir

Rakel Hinriksdóttir

Silvía Rán Sigurðardóttir

Bojana Besic

Inga Dís Júlíusdóttir

Arna Sif Ásgrímsdóttir

Karen Nóadóttir

Elva Friðjónsdóttir

Rakel Hönnudóttir

Mateja Zver

Vesna Smiljkovic