Luca Toni á leiðinni til Roma?

Ítalski framherjinn Luca Toni hefur verið sterklega orðaður við félagsskipti frá Bayern München í sumar eftir komu Mario Gomez og Ivica Olic til félagsins og Monaco og West Ham sögð hafa áhuga á kappanum.

Ef marka má nýlegt viðtal við umboðsmann Toni er hins vegar líklegra að leikmaðurinn snúi aftur á heimaslóðir til Ítalíu en Roma hefur mikinn áhuga á að tryggja sér hans þjónustu.

„Toni er mjög áhugasamur um að snúa aftur til Ítalíu og hann veit af áhuga Roma. En eins og staðan er núna hafa engar formlegar viðræður átt sér stað," segir umboðsmaðurinn Jose Alberti í samtali við Roma Giallo Rossa.