Beckham lagði upp tvö í sigri AC Milan

David Beckham lagði upp tvö mörk í 3-0 sigri AC Milan á Lazio á útivelli í ítölsku úrvalsdeildinni í knattspyrnu í kvöld.

Beckham lék allan leikinn og lagði upp fyrstu tvö mörk leiksins. Fyrst átti hann sendingu á Alexandre Pato sem skoraði á 42. mínútu.

Svo tók hann aukaspyrnu á 47. mínútu sem rataði beint á Massimo Ambrosini sem skoraði annað mark AC Milan með skalla.

Kaka skoraði svo síðasta markið undir lok leiksins en AC Milan er nú sex stigum á eftir toppliði Inter sem gerði jafntefli í sínum leik í dag.

Beckham hefur þótt spila vel síðan hann kom til AC Milan á lánssamningi frá LA Galaxy í upphafi ársins en vangaveltur hafa verið uppi um hvort að AC Milan ætli að reyna að kaupa Beckham frá Bandaríkjunum.

Forráðamenn Galaxy segjast hins vegar fullvissir um að Beckham snúi aftur þann 9. mars eins og samkomulagið kveður á um.