Umfjöllun: Nánast fullkominn leikur hjá KR-ingum

Bikarmeistarar KR unnu frækinn 2-0 sigur gegn gríska félaginu Larissa í Evrópudeild UEFA á KR-velli í kvöld.

Skipulagður varnarleikur, barátta og góð liðsheild skóp sigurinn fyrir Vesturbæinga sem fara út með gott veganesti fyrir seinni leikinn í Grikklandi.

Leikurinn fór rólega af stað en gestirnir í Larissa voru meira með boltann framan af leik, án þess þó að skapa sér alvöru marktækifæri.

KR-ingar voru skipulagðir varnarlega, börðust vel og gáfu ekki mörg færi á sér en náðu illa að koma boltanum í spil til þess að byggja upp hættulegar sóknir.

Þegar líða tók á hálfleikinn óx KR-ingum hins vegar ásmegin og þeir voru frískari en gestirnir, en sem fyrr létu markfærin standa á sér. Helsta ógn KR-inga í fyrri hálfleik kom upp úr föstum leikatriðum en inn vildi boltinn ekki og staðan var marklaus í hálfleik.

Það dró heldur betur til tíðinda á 55. mínútu þegar Gunnar Örn Jónsson átti góðan sprett upp hægri kantinn og sendi fyrir markið á Baldur Sigurðsson sem afgreiddi boltann í netið af stuttu færi. Frábært mark hjá KR-ingum sem voru með fín tök á leiknum þegar þarna var komið við sögu og forystan því verðskulduð.

Eftir markið geisluðu KR-ingar af sjálfstrausti og baráttugleði og spiluðu eins þeir sem valdið höfðu og Grikkirnir áttu engin svör.

Þegar stundarfjórðungur lifði leiks voru KR-ingar nálægt því að bæta við marki en Björgólfur Takefusa rétt missti þá af fyrirgjöf Gunnars Arnar.

Björgólfur var aftur á ferðinni á 82. mínútu þegar hann slapp einn inn fyrir vörn Grikkja en skot hans fór talsvert framhjá markinu.

Allt er þegar þrennt er og í uppbótartíma brást Björgólfi ekki bogalistin þegar hann innsiglaði frækinn 2-0 sigur KR-inga með skoti af stuttu færi eftir frábæran undirbúning hjá Bjarna Guðjónssyni.

Sigur KR-inga var verðskuldaður og þeir uppskáru eins og þeir sáðu gegn sterkum andstæðingi eftir gríðarlega baráttu og vinnusemi frá fyrsta flauti.

Það má segja að leikskipulag KR-inga hafi gengið nánast fullkomlega upp því skot Grikkjanna fóru flest langt yfir mark KR og þau sem rötuðu á markið greip Stefán Logi Magnússon sem var öryggið uppmálað í leiknum.

Annars var allt KR-liðið að standa fyrir sínu í leiknum og rúmlega það og úrslitin mikill sigur fyrir KR og íslenska knattspyrnu.

Tölfræðin:



KR - AE Larissa 2-0 (0-0)

1-0 Baldur Sigurðsson (55.)

2-0 Björgólfur Takefusa (90.+2.)

KR-völlur, áhorfendur ????

Dómari: Tomasz Mikulski frá Póllandi

Skot (á mark): 9-15 (6-4)

Varin skot: Stefán Logi 4 - Seremet 4

Horn: 2-2

Aukaspyrnur fengnar: 17-16

Rangstöður: 2-3



KR (4-5-1)

Stefán Logi Magnússon

Skúli Jón Friðgeirsson

Grétar Sigfinnur Sigurðsson

Mark Rutgers

Jordao Diogo

Gunnar Örn Jónsson

(77., Guðmundur Reynir Gunnarsson)

Bjarni Guðjónsson

Jónas Guðni Sævarsson

Baldur Sigurðsson

Óskar Örn Hauksson

(86., Gunnar Kristjánsson)

Guðmundur Benediktsson

(72., Björgólfur Takefusa)

AE Larissa (4-3-3)

Dino Seremet

Theodoros Tripotseris

Naim Aarab

Nikos Dabizas

Michail Boukouvalas

Romeu

Walter Iglesias

(66., Dimitrios Balis)

Nikolaos Vlasopoulos

Salim Toama

Athanasios Tsigkas

Aleksandar Simic

(81., Savyas Siatravanis)