Torres og Benayoun tæpir

Fernando Torres og Yossi Benayoun eru báðir tæpir vegna meiðsla fyrir síðari leik Liverpool og Real Madrid á Anfield annað kvöld.

Ísraelsmaðurinn Benayoun hefur leikið vel með Liverpool eftir áramótin og hann var hetja liðsins þegar hann skoraði sigurmark enska liðsins í 1-0 sigri þess á Bernabeu í fyrri leiknum.

Torres hefur átt í meiðslavandræðum meira og minna alla leiktíðina, en Rafa Benitez knattspyrnustjóri er bjartsýnn á að hann geti komið við sögu gegn Real annað kvöld.

"Yossi er meiddur á læri og við erum að bíða eftir niðurstöðum lækna. Fernando er að æfa með okkur en hann hefur ekki beitt sér að fullu. Við verðum að sjá hvernig hann verður á morgun. Kannski getur hann spilað einhverjar mínútur, við sjáum til," sagði Benitez.

Þetta er ekki eini höfuðverkur Benitez fyrir morgundaginn því varnarmennirnir Alvaro Arbeloa og Daniel Agger eru líka í vandræðum með meiðsli og ekki kemur í ljós fyrr en á morgun hvort þeir ná leiknum.