KPMG hættir störfum fyrir dótturfélag Baugs í Danmörku

Endurskoðendafyrirtækið KPMG hefur hætt störfum fyrir BG Denmark, dótturfélag Baugs þar í landi, skömmu áður en birta á ársreikninga félagsins. Viðskiptablaðið Börsen greinir frá þessu í dag og segir jafnframt að þetta dótturfélag geti orðið bitbein í uppgjörinu á þrotabúi Baugs.

Börsen segir að þetta sé vegna þess að félagið, sem á eignir upp á 200 milljónir danskra kr. eða um 5 milljarða kr., var selt til Gaums nokkrum mánuðum fyrir gjaldþrot Baugs. Þessi sala hefur verið umtöluð hér á landi en meðal eigna BG Denmark var skíðahótel í Courchevel í frönsku Ölpunum og lúxusfasteign við Galionsvej í Christianshavn.

Fram kemur í umfjöllun Börsen að KPMG hafi árum saman verið endurskoðendafyrirtæki Baugs sem á „velmektardögum" sínum var með starfsemi á Íslandi, Bretlandseyjum og í Danmörku.

KPMG mun halda áfram störfum sínum fyrir önnur félög í Danmörku sem eru hluti af þrotabúi Baugs. Hinsvegar vildi talsmenn KPMG ekki tjá sig um brottförina frá BG Denmark og báru fyrir sig þagnarskyldu.