Ancelotti: Góð úrslit en ekki góð spilamennska

Knattspyrnustjórinn Carlo Ancelotti hjá Chelsea viðurkenndi að lið sitt hafi ef til vill ekki verið að spila sinn besta leik í 0-1 sigri sínum gegn Apoel Nicosia í kvöld en var þó ánægður með sigurinn.

Nicolas Anelka skoraði sigurmark Chelsea snemma leiks en hann skoraði einnig sigurmark liðsins í fyrstu umferð riðlakeppni Meistaradeildarinnar í 1-0 sigri gegn Porto.

„Þetta voru góð úrslit fyrir okkur en ekki góð spilamennska hjá liðinu. Ég er þó ekkert reiður við leikmenn mína því leikmenn Apoel Nicosia voru að spila vel og áttu í raun skilið að fá eitthvað út úr leiknum.

Við þurfum hins vegar að bæta okkur ef við ætlum okkur einhverja hluti á tímabilinu. Það er alveg á hreinu," sagði Ancelotti í leikslok í kvöld.