Adriano: Jose segir að ég sé bestur

Brasilíski framherjinn Adriano hjá Inter hefur ekki gert gott mót á knattspyrnuvellinum undanfarin ár eftir baráttu við þunglyndi og ofdrykkju.

Adriano hefur nú fullan hug á því að ná tökum á lífi sínu á ný eftir að hafa verið lánaður til Sao Paolo í heimalandinu og virðist staðráðinn í að finna sitt gamla form - sem varð til þess að hann var kallaður "Keisarinn" og var almennt álitinn einn skæðasti framherji heimsins.

Adriano er mjög hrifinn af áherslum Jose Mourinho þjálfara og fagnar því líka að vera laus við Roberto Mancini.

"Ég þakka Guði fyrir að Mourinho sé kominn hingað og það er honum að þakka að ég er kominn hingað aftur. Allir vita að ég átti ekki gott samband við Manchini, en Mourinho hefur fulla trú á mér. Traust hans hefur gefið mér aukna trú á sjálfan mig og það er mikilvægt fyrir knattspyrnumann. Hann sagði mér líka að ég væri besti framherjinn hans og það hefur eflt mig enn frekar. Mourinho er frábær persónuleiki og hann talar við mann augliti til auglitis," sagði Adriano.