Gasol missir af næstu þremur leikjum

Spánverjinn Pau Gasol getur ekki spilað með liði LA Lakers næstu þrjá leikina í það minnsta eftir að hann sneri sig á ökkla í tapinu gegn New Orleans í nótt. Þetta þýðir að þrír af miðherjum Lakers-liðsins eru á meiðslalista.

Gasol hefur veirð frábær með liði Lakers síðan hann kom til liðsins frá Memphis í síðasta mánuði. Með hann innanborðs hefur liðið skotist á toppinn í Vesturdeildinni og eru Lakers og Houston Rockets nú hnífjöfn í efsta sæti Vesturdeildar.

"Við verðum að breyta dálítið um leikstíl, það gefur augaleið," sagði Kobe Bryant í samtali við LA Times, en nú er Ronny Turiaf eini miðherji liðsins. "Við verðum að tefla fram lágvöxnu liði og ég verð að vera mjör hreyfanlegur svo móherjarnir umkringi mig ekki í hverjum leik," sagði aðalstjarna Lakers-liðsins.