Grant er sigurviss

Avram Grant stjóri Chelsea er nokkuð sigurviss fyrir leiki liðsins gegn Fenerbache í Meistaradeildinni, en bendir á að tyrkneska liðið sé sýnd veiði en ekki gefin.

"Fenerbache er lið sem spilaði mjög vel í riðlakeppninni og hefur unnið lið eins og Inter á heimavelli. Þeir eru mjög erfiðir heim að sækja. Þetta lið sló Sevilla út úr keppninni og menn muna kannski að Sevilla hefur unnið lið eins og Real Madrid og Barcelona," sagði Grant. Hann hefur samt fulla trú á sínum mönnum og segir takmark liðsins alveg á hreinu óháð mótherjunum.

"Við erum lið sem hefur ekki komist í úrslitaleikinn og þangað ætlum við okkur. Þetta er okkar aðaltakmark á næsta ári, en við viljum gjarnan gera það strax í vor," sagði Grant.