Zlatan tæpur fyrir síðari leikinn gegn Liverpool

Sænski markahrókurinn Zlatan Ibrahimovic gæti misst af síðari leik Inter og Liverpool í 16-liða úrslitum Meistaradeildarinnar vegna hnémeiðsla. Hann missir væntanlega af leik Inter og Roma í A-deildinni annað kvöld.

"Ég er búinn að finna til í hnénu nokkuð lengi og ég veit ekki hvenær það verður gott aftur. Ég vil sem minnst segja um þetta því ég er bara að hugsa um að vinna leiki. Ég geri mér samt grein fyrir að ég er búinn að vera að taka áhættu með því að spila og verð nú að taka mér hvíld," sagði Ibrahimovic.

Mikil bjartsýni ríkir í herbúðum Inter þrátt fyrir að enska liðið sé með 2-0 forskot eftir fyrri leikinn. Forseti Inter lýsti því yfir á dögunum að Inter gæti hægilega skorað meira en 10 mörk á Liverpool á góðum degi.

"Við hefðum geta náð miklu hagstæðari úrslitum úr fyrri leiknum og Liverpool hefði aldrei unnið hann ef Materazzi hefði ekki fengið rautt spjald. Ég sá ekki þessi meintu brot hans og hann sagði mér að þetta hefði ekki verið rétt. Dómarinn gerði mistök," sagði Zlatan.