Inter og Zlatan hótað með byssukúlubréfum

Inter Milan varð í dag annað ítalska knattspyrnufélagið á tveimur dögum til að fá hótunarbréf sem innhélt byssukúlur. Hótanirnar beindust að forseta og þjálfara Inter, sem og framherjanum Zlatan Ibrahimovic.

Fyrir tveimur dögum barst svipað bréf á skrifstofur AC Milan, en mál þessi eru nú til rannsóknar hjá lögreglu - sem lítur þetta mjög alvarlegum augum.

Í bréfinu sem Inter fékk sent var stjórnarformaðurinn Massimo Moratti hvattur til að "fara mjög, mjög varlega" og þjálfarinn Roberto Mancini og sænski framherjinn Zlatan Ibrahimovic fengu líka hótanir.