Abidal vill ekki spila

Eric Abidal hefur beðið Frank Rijkaard, stjóra Barcelona, að kippa sér út úr byrjunarliðinu vegna þess að hann er óánægður með eigin frammistöðu.

Það hefur ýmislegt gengið á í herbúðum Börsunga undanfarnar vikur. Fréttir þess efnis að Ronaldinho sé á leið til Ítalíu hafa tröllriðið fjölmiðlum en hann hefur ekki spilað með Barcelona lengi vegna meiðsla.

Það hafa reyndar ýmsir gefið í skyn að Ronaldinho sé alls ekkert meiddur, heldur að hann hafi verið útskúfaður vegna þess að hann hafi lagt of mikla áherslu á félagslífið sitt.

En Abidal segir að sér hafi gengið illa að aðlagast spænsku knattspyrnunni. „Ég vil vera 100 prósent en ég er ekki ánægður með sjálfan mig. Ég lít því á það sem mína skyldu að biðja þjálfarann um að nota mig ekki."

Hann segir að sér finnist ekki gott að spila seint á kvöldin eins og tíðkast oft á Spáni. „Það hefur haft sín áhrif á mig að spila klukkan tíu á kvöldin," sagði Abidal.