Bandarískir markaðir opna í plús

Gengi hlutabréfa hækkaði almennt í fyrstu viðskiptum dagsins í Bandaríkjunum dag eftir mikið fall síðustu daga. Helsta ástæðan fyrir hækkuninni nú skýrist einmitt af því að fjárfestar telja hlutabréfaverð á einkar ágætum kjörum nú um stundir, líkt og bandaríska dagblaðið Wall Street Journal tekur til orða.

Svipaða sögu er að segja af evrópskum hlutabréfamörkuðum.

Markaðirnir féllu hratt í vikunni eftir að bandaríska þríeykið General Motors, Ford og Chrysler opinberuðu að þau glími við alvarlega rekstrarvanda og ættu á hættu að fara í þrot verði eigið fé þeirra ekki aukið með einum eða öðrum hætti. Forráðamenn fyrirtækjanna leituðu til Bandaríkjaþings eftir fjármagni en fengu dræmar undirtektir.

Ennfremur voru minnispunktar og hagspá bandaríska Seðlabankans birt í vikunni en það er dregin upp afar dökk mynd um þróunina í efnahagslífinu á næstu misserum.

Dow Jones-hlutabréfavísitalan hefur nú hækkað um 0,75 prósent og Nasdaq-vísitalan um 0,93 prósent.

Þá hefur S&P 500-vísitalan hækkað um 1,07 prósent. Hún féll verulega í vikunni og hafði ekki verið lægri síðan á vordögum 1997.