Óvissa um framtíð Donadoni

Ítalska knattspyrnusambandið hefur enn ekki tekið ákvörðun um framtíð Roberto Donadoni landsliðsþjálfara. Talið var að Donadoni yrði látinn taka pokann sinn ef ítalska liðið næði ekki að komast í undanúrslit EM.

Óheppnin spilaði þó sína rullu í því að liðið tapaði fyrir Spáni og horfir ítalska sambandið til þess. Giancarlo Abete, forseti knattspyrnusambands Ítalíu, ætlar að setjast niður með Donadoni og ræða frammistöðu Ítalíu á mótinu.

Donadoni tók við af Marcello Lippi sem hætti eftir að Ítalía varð heimsmeistari 2006. Ítalskir fjölmiðlar kalla eftir því að Lippi snúi aftur í þjálfarastólinn og telja það líklegan möguleika.