Ronaldo fór með United til Spánar

Cristiano Ronaldo verður í leikmannahópi Manchester United fyrir leikinn gegn Villarreal í Meistaradeildinni á morgun þrátt fyrir að hafa farið meiddur af velli í deildarleik um helgina.

Samkvæmt tilkynningu á heimasíðu félagsins fór hann vandræðalaust í gegn um æfingu með liðinu í morgun og er því í 20 manna hóp Ferguson fyrir leikinn á Spáni.

Markvörðurinn reyndi Edwin van der Sar fór hinsvegar ekki með liðinu í Spánarferðina og sömu sögu er að segja af þeim Dimitar Berbatov, Danny Welbeck og Gary Neville.

Neville er meiddur á læri og er sagður tæpur fyrir grannaslag United gegn City eftir hádegið á sunnudaginn kemur.

Berbatov er líka meiddur á læri, Welbeck tók ekki þátt í æfingum í dag, en Van der Sar er hvíldur.

Miðjumaðurinn Paul Scholes var með á æfingu í dag en er enn ekki orðinn leikfær.

Manchester United þarf aðeins eitt stig á morgun til að komast áfram í keppninni.