Gerrard: Þetta var úrslitaleikur

"Við spiluðum þennan leik eins og um sannan úrslitaleik væri að ráða eins og stjórinn vildi og það gekk eftir frá markverði til fremsta manns," sagði Steven Gerrard, fyrirliði Liverpool eftir 4-0 sigurinn á Marseille í Meistaradeildinni í kvöld.

"Við gáfum allt í þetta verkefni og þó við vitum að við séum með hæfileikamenn í okkar röðum, fengum við líka frábæra baráttu og gott hugarfar og það skilaði okkur í kvöld," sagði Gerrard. "Við gerðum okkur þetta erfitt fyrir í riðlakeppninni og það var synd að þurfa að bíða með að komast áfram þangað til í síðasta leik."

Hann var spurður að því hvort leikurinn í kvöld hefði hugsanlega verið sá síðasti hjá Rafa Benitez ef illa hefði farið.

"Við einbeitum okkur að því sem fram fer á vellinum. Það sem gerist utan hans er milli stjórans og eigendanna," sagði Gerrard.

Félagi hans Jamie Carragher sagði þetta einn besta leik sinn með liðinu. "Ég held að þetta hafi verið ein okkar allra besta frammistaða og það er frábært að vera komnir í 16-liða úrslitin," sagði varnarmaðurinn.