Náðum að snúa við blaðinu eftir slakan fyrri hálfleik

„Ég er virkilega ánægður. Ekki bara útaf markinu heldur vegna þess að við unnum þennan leik," sagði Cristiano Ronaldo sem skoraði sigurmark Manchester United gegn Sporting Lissabon í kvöld.

Ronaldo var keyptur til United frá Sporting en hann skoraði sigurmarkið í báðum viðureignum þessara liða í riðlinum. „Ég er stoltur af þessu marki. Ég hef æft aukaspyrnur vel og það var gaman að sjá boltann í markinu," sagði Ronaldo.

„Við lékum illa í fyrri hálfleik en komumst í gang í þeim síðari og áttum skilið að vinna þennan leik."

AC Milan, Barcelona, Manchester United, Inter, Sevilla, Roma og Arsenal hafa öll tryggt sér áfram í sextán liða úrslit Meistaradeildarinnar þrátt fyrir að ein umferð sé eftir af riðlakeppninni.