NBA í nótt: Fimm lið með sjö sigra

Þrettán leikir fóru fram í NBA-deildinni í nótt en eftir leikina hafa fimm lið í deildinni unnið sjö sigra á tímabilinu.

Öll þessi lið unnu sigra í sínum leikjum í nótt. Boston Celtics fór létt með New Jersey Nets, 91-69, og Utah Jazz vann sinn fimmta leik í röð þegar liðið hafði betur gegn Toronto, 92-88.

Liðin hafa þó leikið mismarga leiki og er Boston enn taplaust en Utah hefur tapað tveimur.

Orlando Magic heldur áfram að koma þægilega á óvart og vann í nótt nauman sigur á Cleveland, 117-116. Liðið hefur nú unnið sjö og tapað tveimur, rétt eins og Utah og New Orleans sem í nótt vann 19 stiga sigur á Philadelphia, 95-76.

Liðið með næstbesta árangurinn í deildinni er San Antonio Spurs sem hefur unnið sjö leiki en tapað aðeins einum. Liðið var hins vegar eitt þeirra fjögurra í deildinni sem átti ekki leik í nótt.

Leikur Utah og Toronto var leikur tveggja sterkra varnarliða og var aðeins eins stiga munur á liðunum þegar átján sekúndur voru til leiksloka. Deron Williams sýndi þá stáltaugar þegar hann kláraði tvö vítaköst á þessum tíma og klikkaði TJ Ford á þriggja stiga skoti í blálokin.

Carlos Boozer var með 23 stig í leiknum og fjórtán fráköst og skoraði hann síðustu körfu leiksins úr vítakasti á síðustu sekúndu leiksins.

Sigur Boston á New Jersey var þægilegur en Kevin Garnett var stigahæsti leikmaður liðsins með sextán stig og átta fráköst.

LeBron James átti stórleik fyrir Cleveland gegn Orlando. Hann skoraði 39 stig, tók þrettán fráköst og gaf fjórtán stoðsendingar. Það dugði hins vegar ekki til þar sem Orlando reyndist sterkara í framlengingunni.

Dwyane Wade lék sinn fyrsta leik á tímabilinu fyrir Miami Heat og skoraði fimmtán stig á þeim 25 mínútum sem hann lék. Það dugði hins vegar ekki til þar sem liðið tapaði fyrir Seattle, 104-95. Þetta var fyrsti sigur Seattle á leiktíðinni.

Úrslit leikjanna í nótt:

Toronto Raptors - Utah Jazz 88-92

Washington Wizards - Indiana Pacers 103-90

Atlanta Hawks - Charlotte Bobcats 117-109

Cleveland Cavaliers - Orlando Magic 116-117

Boston Celtics - New Jersey Nets 91-69

Miami Heat - Seattle SuperSonics 95-104

Milwaukee Bucks - Memphis Grizzlies 102-99

New Orleans Hornets - Philadelphia 76ers 95-76

Minnesota Timberwolves - Sacramento Kings 108-103

Houston Rockets - LA Lakers 90-93

Denver Nuggets - Portland Trail Blazers 110-93

LA Clippers - New York Knicks 84-81

Golden State Warriors - Detroit Pistons 104-111