Wenger: Sýndum skynsemi

Arsene Wenger, stjóri Arsenal, segir að sérstakur andi sé yfir liðinu um þessar mundir og vonast til að hann endist. Liðið vann Steaua Búkarest í kvöld 1-0 í Meistaradeild Evrópu.

Þetta var annar sigur Arsenal í jafnmörgum leikjum í keppninni. „Við þurftum að sýna skynsemi og þolinmæði og það gerðum við. Ég er ánægður með að við náðum að koma í veg fyrir að þeir næðu skyndisóknum," sagði Wenger.

„Leikmenn eru mjög einbeittir þessa dagana og það sást vel í þessum leik. Ég er mjög ánægður með spilamennsku liðsins, það er sterkt að ná þremur stigum á útivelli."

Arsenal hefur farið gríðarlega vel af stað á tímabilinu og er á toppi ensku úrvalsdeildarinnar.