James gæti misst af fæðingu sonar síns

Ofurstjarnan LeBron James hjá Cleveland Cavaliers í NBA deildinni hefur í nægu að snúast þessa dagana. Lið hans mætir San Antonio Spurs í fyrsta leik lokaúrslitanna annað kvöld, en þar að auki eiga hann og kona hans von á barni á þjóðhátíðardag Íslendinga.

Þau hjónin eiga fyrir son sem fæddist árið 2004 og heitir hann því frumlega nafni LeBron James yngri. Barn númer tvö, sem er drengur, er sett á 17. júní en á þeim degi mætast Cleveland og San Antonio í fimmta leik í Texas. James segist ekki eiga von á því að kona hans eignist barnið fyrr en eftir þá dagsetningu, en segist jafnframt njóta skilnings í fjölskyldunni ef til þess kæmi að hann missti af fæðingunni. Það er heldur ekki á hverjum degi sem menn leika til úrslita um NBA meistaratitilinn.