Duncan og Bowen í varnarúrvali NBA

Varnarlið ársins í deildarkeppni NBA var tilkynnt í dag og þar ber hæst að fastagestirnir í úrvalsliðinu og samherjarnir Tim Duncan frá San Antonio voru á sínum stað. Auk þeirra voru þeir Marcus Camby frá Denver, Kobe Bryant frá LA Lakers og Raja Bell frá Phoenix í varnarliði ársins.

Þetta er í tíunda skiptið í röð sem Duncan er í varnarúrvali deildarinnar en félagi hans Bowen var í því í sjöunda skipti og fékk flest atkvæði allra í liðið að þessu sinni. Varnarmaður ársins, Marcus Camby, var í liðinu í þriðja sinn, Kobe Bryant í sjöunda - en Raja Bell hjá Phoenix var í fyrsta sinn valinn í úrvalslið varnarmanna.

Í öðru besta varnarliðinu voru þeir Ben Wallace og Kirk Hinrich frá Chicago, Jason Kidd frá New Jersey, Tayshaun Prince frá Detroit og Kevin Garnett frá Minnesota. Það var nefnd skipuð þjálfurum liðanna í deildinni sem stóð að valinu en þjálfarar máttu ekki gefa eigin leikmönnum atkvæði.

Varnarúrvalið (Stig)



Bruce Bowen, San Antonionio 42

Tim Duncan, San Antonio 36

Marcus Camby, Denver 34

Kobe Bryant, L.A. Lakers 32

Raja Bell, Phoenix 25

Annað liðið (stig)

Ben Wallace, Chicago 33

Jason Kidd, New Jersey 23

Tayshaun Prince, Detroit 21

Kevin Garnett, Minnesota 20

Kirk Hinrich, Chicago 18