Aftaka á Old Trafford

Manchester United tryggði sér í kvöld sæti í undanúrslitum Meistaradeildar Evrópu með ótrúlegum 7-1 sigri á ítalska liðinu Roma í síðari viðureign liðanna í 8-liða úrslitum. Enska liðið fór hreinlega á kostum í kvöld og gerði út um leikinn með þremur mörkum á átta mínútna kafla þegar aðeins 19 mínútur voru liðnar af leiknum.

Michael Carrick skoraði fyrsta markið á elleftu mínútu með skoti utan teigs, en þar mátti setja stórt spurningamerki við frammistöðu rómverska markvarðarins. Alan Smith og Wayne Rooney komu United í 3-0 eftir aðeins 19 mínútur og Ronaldo skoraði laglegt mark á 44. mínútu og gerði endanlega út um einvígið.

Michael Carrick og Ronaldo bættu báðir við marki í síðari hálfleiknum áður en Patrice Evra skoraði sjöunda markið. Daniele De Rossi skoraði mark gestanna með viðstöðulausu skoti í bláhornið, en það var of lítið og of seint hjá gestunum sem hreinlega gáfust upp í hálfleik. United er því komið áfram samtals 8-3 og mætir Bayern eða AC Milan í undanúrslitunum.