Arenas missir af úrslitakeppninni

Nú hefur verið staðfest að Gilbert Arenas, leikmaður Washingto Wizards, muni missa af úrslitakeppninni vegna hnémeiðsla sem hann varð fyrir í nótt. Arenas verður frá keppni í 2-3 mánuði, en aðeins nokkrir dagar eru síðan annar stjörnuleikmaður, Caron Butler, meiddist hjá liðinu og verður tæplega með í úrslitakeppninni.

Arenas er einn skemmtilegasti sóknarleikmaður deildarinnar og skorar að meðaltali rúm 28 stig í leik. Hann var valinn í stjörnuliðið þriðja árið í röð í febrúar, en hætt er við því að möguleikar Washington í úrslitakeppninni séu allt nema úr sögunni eftir að tveir af bestu mönnum liðsins meiddust.