Phoenix skellti Dallas

Tólf leikir fóru fram í NBA deildinni í körfubolta í nótt og þar af voru þrír stórleikir á dagskrá. Phoenix jafnaði einvígið við Dallas í deildarkeppninni með 126-104 sigri á heimavelli. Utah vann afar mikilvægan útisigur á Houston og Detroit lagði Miami í uppgjöri risanna í Austurdeildinni.

Leikur Phoenix og Dallas var sýndur beint á Sýn í gærkvöld og olli ekki áhorfendum vonbrigðum frekar en fyrri leikir liðanna í vetur. Leandro Barbosa fór fyrir liði Phoenix og skoraði 29 stig en Josh Howard skoraði 28 stig fyrir Dallas.

Utah tryggði stöðu sína í fjórða sæti Vesturdeildarinnar með góðum útisigri á Houston 86-83. Mehmet Okur skoraði 20 stig fyrir Utah en Yao Ming var með 36 stig og hirti 16 fráköst fyrir heimamenn.

Detroit lagði Miami 94-88 á heimavelli þar sem Rip Hamilton skoraði 19 stig fyrir Detroit en Shaquille O´Neal skoraði 23 stig fyrir Miami.

Chicago vann 11. sigurinn í röð á Atlanta með 105-97 útisigri. Luol Deng skoraði 30 stig fyrir Chicago en Josh Smith var með 24 stig og 12 fráköst hjá Atlanta.

Golden State skellti Memphis 122-117. Jason Richardson skoraði 26 stig fyrir Golden State en Pau Gasol var með 23 hjá Memphis.



Washington náði toppsætinu í Suðausturriðlinum með 121-107 útisigri á Milwaukee, en Caron Butler handarbrotnaði og verður tæplega með liðinu í úrslitakeppninni.

Cleveland tapaði fyrir Boston 98-96. Larry Hughes skoraði 24 stig fyrir Cleveland en Gerald Green skoraði 25 fyrir Boston. LeBron James lék ekki með Cleveland vegna meiðsla.

Minnesota vann góðan útisigur á Orlando 105-104 eftir framlengdan leik. Ricky Davis skoraði 36 stig fyrir Minnesota en Grant Hill 23 fyrir Orlando.

Toronto tryggði sér sæti í úrslitakeppninni í fyrsta skipti í fimm ár með sigri á Charlotte á heimavelli 107-94. Chris Bosh skoraði 24 stig og hirti 16 fráköst fyrir Toronto en Walter Herrmann skoraði 22 stig fyrir Charlotte.

Jamal Tinsley tryggði Indiana óvæntan sigur á San Antonio 100-99. Mike Dunleavy skoraði 21 stig fyrir Indiana en Tony Parker 22 fyrir San Antonio.

Denver lagði Seattle 114-103 á útivelli. Carmelo Anthony skoraði 32 stig fyrir gestina en Earl Watson 28 stig fyrir Seattle.

Loks vann LA Lakers 126-103 sigur á Sacramento í beinni á NBA TV. Mo Evans skoraði 21 stig fyrir Lakers og Kobe Bryant skoraði 19 stig og gaf 13 stoðsendingar. Ron Artest skoraði 26 stig fyrir Sacramento.