Livingston fór úr hnjálið

Leikstjórnandinn Shaun Livingston hjá LA Clippers varð fyrir heldur óskemmtilegri reynslu í leik liðsins gegn Charlotte Bobcats í nótt en hann lenti illa í byrjun leiksins og fór úr hnjálið. Ljóst er að leikmaðurinn verður frá keppni um óákveðinn tíma þó meiðslin væru raunar ekki jafn alvarleg og útlit var fyrir í fyrstu. Hann á enn eftir að fara í frekari læknisrannsóknir.

Livingston hefur verið afar óheppinn með meiðsli allar götur síðan hann hóf að leika með liði Clippers, en meiðsli hans nú gætu átt eftir að setja stórt strik í reikninginn fyrir liðið. Eftir að hafa komið mjög á óvart á síðustu leiktíð hefur lið Clippers alls ekki spilað vel í vetur og er tæpt með að komast í úrslitakeppnina með 27 sigra og 29 töp.