David Lee hitti úr öllum 14 skotum sínum

Framherjinn David Lee hjá New York Knicks stal senunni í nýliðaleiknum árlega um stjörnuhelgina í NBA. Leikurinn er viðureign úrvalsliðs leikmanna á öðru ári í deildinni gegn úrvalsliði nýliða. Þeir eldri höfðu sigur enn eitt árið og að þessu sinni var sigurinn stór 155-114.

David Lee fór á kostum í liði þeirra eldri og skoraði 30 stig og hitti úr öllum 14 skotum sínum utan af velli. Monta Ellis skoraði 28 stig og Chris Paul var einnig frábær í liði þeirra eldri og skoraði 16 stig, gaf 17 stoðsendingar og stal 9 boltum. Eins og tölurnar gefa til kynna var lítið um varnir í leiknum sem var mjög hraður og fjörugur.

Paul Millsap frá Utah og Rudy Gay frá Memphis voru stigahæstir í liði nýliða með 22 stig hvor, en þeir yngri áttu aldrei möguleika í leiknum og lentu mest 43 stigum undir.