Nesta vill framlengja við Milan

Ítalski landsliðsmaðurinn Alessandro Nesta segist ólmur vilja framlengja samning sinn við AC Milan á Ítalíu, sem þó rennur ekki út fyrr en á næsta ári. Nesta hefur verið orðaður við önnur lið í Evrópu undanfarið.

Ítalskir fjölmiðlar hafa þannig gert því skóna að Nesta færi hugsanlega aftur til Lazio þar sem hann varð á sínum tíma sá öflugi miðvörður sem hann er í dag. Nesta er þrítugur og er sem stendur í Bandaríkjunum hjá sérfræðingum þar sem hann er að jafna sig af alvarlegum axlarmeiðslum. Hann vonast til þess að geta farið að spila með Milan fljótlega.