Davids fer frítt til Ajax

Fjölmiðlar í Hollandi greindu frá því fyrir stundu að Ajax hefði náð samkomulagi við miðjumanninn Edgar Davids um 18-mánaða samning sem skrifað verður undir um leið og leikmaðurinn hefur staðist læknisskoðun. Davids fer á frjálsri sölu frá Tottenham.

Hinn 33-ára gamli Davids snýr því aftur á þær slóðir sem hann hóf feril sinn hjá en hann sló fyrst í gegn með gullaldarliði Ajax sem uppi var fyrir rúmum áratug.

Síðan þá hefur Davids spilað með AC Milan, Juventus, Barcelona, Inter Milan og nú síðast Tottenham, þar sem hann hefur fengið fá tækifæri á þessari leiktíð.