Betware nemur land á Spáni

Undirritaður hefur verið samningur íslenska hugbúnaðar- og þjónustufyrirtækisins Betware og Spænska ríkislottósins um að Betware þjónusti lottóið á sviði gagnvirkra leikja. Samningurinn er gerður við STL (Sistemas Técnicos de Loterías del Estado) sem er að fullu í eigu ríkislottósins.

„Spænska ríkislottóið vill þróa leikjaframboð sitt þannig að viðskiptavinir geti tekið þátt í leikjum á Internetinu, farsímum og gagnvirku sjónvarpi,“ segir í tilkynningu Betware. Þar kemur einnig fram að þeir leikir sem STL býður upp á nú þegar verði jafnframt fluttir yfir í kerfi Betware.

Haft er eftir Alfonso P. Fernandez hjá STL að meðal annars hafi verið horft til sveigjanleika lausnar Betware sem þýði að hægt sé á skömmum tíma að bæta við nýjum leikum.

„Samningurinn við STL skiptir miklu máli fyrir Betware þar sem um er að ræða eitt stærsta ríkislottó í heimi. Árið 2005 var Spænska ríkislottóið það stærsta í heimi með 11 milljarða dollara í sölutekjur sem er nálægt 13 prósentum af heildarsölu allra lottómiða í Evrópu. Segja má að með þessum samningi sé Betware komið á kortið sem verðugur keppinautur á þessum markaði,“ segir í tilkynningunni um samninginn, en í kjölfar hans er fyrirtækið sagt munu stækka um að minnsta kosti helming.

Betware var stofnað árið 1998 og er með höfuðstöðvar í Reykjavík. Að auki er fyrirtækið með þrjú útibú í Evrópu og Norður-Ameríku. Hjá Betware starfa ríflega 60 manns, en áætlanir gera ráð fyrir að starfsmenn verði um 90 fyrir árslok.