Federer og Mauresmo heiðruð

Roger Federer og Amelie Mauresmo hafa verið kjörin tennisleikarar ársins og verðugustu sendiherrar íþróttarinnar af samtökum íþróttafréttamanna í greininni. Þetta er þriðja árið í röð sem Federer hlýtur þessa nafnbót en í fyrsta skipti sem Mauresmo hlýtur hana.

Mauresmo vann loksins stórmót þegar hún sigraði á opna ástralska meistaramótinu og vann svo Wimbledon mótið í júlí. Federer var gjörsamlega óstöðvandi að venju og sigraði á öllum stóru mótunum nema opna franska þar sem hann tapaði fyrir Rafael Nadal í úrslitaleik.