Gummersbach og Ciudad áfram

Íslendingaliðið Gummersbach vann í dag sigur á rússneska liðinu Medvedi 32-29 í síðari viðureign liðanna í 16-liða úrslitum Meistaradeildarinnar í handbolta, en leikið var í Þýskalandi. Segja má að leikurinn hafi verið formsatriði fyrir lærisveina Alfreðs Gíslasonar eftir sex marka sigur í útileiknum. Róbert Gunnarsson skoraði 7 mörk fyrir Gummersbach, Guðjón Valur Sigurðsson 7 og varnarjaxlinn Guðlaugur Arnarsson 1.

Ólafur Stefánsson skoraði sex mörk fyrir Ciudad Real í dag þegar liðið tryggði sér sæti í 8-liða úrslitunum með sigri á danska liðinu GOG 31-30 á Spáni. Ciudad vann fyrri leikinn í Danmörku með fimm mörkum.