Gerrard á að spila á miðjunni

Framherjinn Peter Crouch hjá Liverpool telur að það sé heppilegast fyrir félaga sinn Steven Gerrard að spila alltaf inni á miðri miðjunni líkt og hann gerði í leiknum gegn PSV Eindhoven í Meistaradeildinni í gær. Rafa Benitez, stjóri Liverpool, hefur verið harðlega gagnrýndur fyrir að tefla Gerrard fram á hægri kanti líkt og Steve McClaren hefur stundum gert hjá enska landsliðinu.

"Ég tel að Gerrard finni sig í alla staði betur á miðri miðjunni og þegar hann er í stuði þar er hann frábær. Það þýðir ekki að hann geti ekki verið besti leikmaðurinn á vellinum þegar hann spilar á hægri kantinum, en ég held að hann nýtist liðinu oftast best á miðjunni. Nú þegar þeir Xabi Alonso og Momo Sissoko eru meiddir, getur líka vel verið að Gerrard fái fleiri tækifæri til að spila í sinni uppáhaldsstöðu, en það er auðvitað undir þjálfaranum komið. Ég veit að hann spjarar sig í hvaða stöðu sem er á vellinum," sagði Crouch.