Fylkir fær góðan liðsstyrk

Fylkismenn hafa fengið góðan liðsstyrk fyrir átökin næsta sumar en í dag gekk félagið frá samningi við þrjá nýja leikmenn, þá David Hannah, Kristján Valdimarsson og Frey Guðlaugsson. Hörður Magnússon greindi frá þessu í íþróttafréttum Stöðvar 2 í kvöld.

David Hannah kemur úr röðum Grindavíkur og er 33 ára gamall leikmaður með gríðarlega reynslu. Kristján Valdimarsson er 22 ára gamall varnar- og miðjumaður sem einnig lék með Grindavík í sumar, en hann er nú á leið í raðir uppeldisfélags síns á ný. Þá hefur Fylkir fengið til sín Frey Guðlaugsson frá Þór á Akureyri, en hann er uppalinn á Djúpavogi og hafði leikið með norðanliðinu síðan árið 2002.