ÍA vill halda Arnari og Bjarka

Stjórn meistaraflokks ÍA hefur farið þess á leit við þá Arnar og Bjarka Gunnlaugssyni að þeir verði áfram í röðum félagsins eftir að ljóst varð að Guðjón Þórðarson tæki við starfi þeirra sem þjálfari félagsins í Landsbankadeildinni. Þetta kemur fram á vefnum Skessuhorni í dag.

Haft er eftir Gísla Gíslasyni, formanni rekstrarfélagsins, að bræðurnir eigi heiður skilinn fyrir störf sín fyrir félagið og að þess hafi strax verið farið á leit við þá að halda áfram að spila fyrir það á næstu leiktíð. Áformað sé að ræða við þá bræður þegar þeir komi úr fríi.