Boðar tiltekt í hópnum

David Moyes var ekki par kátur með að hans menn næðu aðeins 2-2 jafntefli við Wigan á heimavelli sínum í ensku úrvalsdeildinni í dag. Moyes gagnrýndi leikmenn sína fyrir að fá á sig tvö óþarfa mörk og boðar breytingar í hóp sínum í kjölfarið.

"Það sorglega við þennan leik er að Wigan fékk ekki eitt einasta almennilega marktækifæri í leiknum, en samt skora þeir tvö mörk. Þeir fá þessi mörk eftir tvö aulamistök hjá okkur og ég sætti mig ekki við svoleiðis. Við erum loksins komnir í þá aðstöðu að vera með stóran hóp og því get ég einfaldlega kippt mönnum út úr liðinu ef þeir spila svona. Mér fannst við eiga skilið að vinna þennan leik, en ef maður horfir á heildarmyndina, ætti ég þó að geta lifað með því að vera taplausir með þrjá sigra eftir fimm leiki," sagði Moyes.