Valur meistari

Valsstúlkur eru bikarmeistarar eftir magnaðan sigur á Breiðablik eftir vítaspyrnukeppni í maraþon-úrslitaleik VISA-bikarsins. Það var Guðný Óðinsdóttir sem tryggði Val sigur með því að skora úr síðustu spyrnu liðsins en hetja liðsins var markvörðurinn Guðbjörg Gunnarsdóttir en hún varði tvær spyrnur frá Blikum.

Margrét Lára Viðarsdóttir átti stórleik fyrir Val og hélt liðinu inni í leiknum nánast einsömu. Eftir venjulegan leiktíma var staðan 2-2 en Erna Sigurðardóttir kom Blikum yfir í fyrri hálfleik framlengingarinnar. Margrét Lára, yfirburðaleikmaður í íslenskri kvennaknattspyrnu, jafnaði snemma í síðari hálfleik framlengingarinnar og því þurfti að grípa til vítaspyrnukeppni til að ná fram úrslitum.

Valsstúlkur eru tvöfaldir meistarar í kvennaboltanum í ár því stutt er síðan liðið tryggði sér Íslandsmeistaratitilinn.