Gravesen til Celtic

Danski landsliðsmaðurinn Thomas Gravesen hefur gengið frá þriggja ára samningi við Glasgow Celtic í Skotlandi, en félagið festi í dag kaup á honum frá spænska félaginu Real Madrid. Í gær bárust þær fréttir að slitnað hefði upp úr viðræðum milli leikmannsins og forráðamanna Celtic, en þær reyndust ekki á rökum reistar.

"Það er frábært að vera orðinn leikmaður Celtic, því þetta félag á sér ríka sögu og er einn stærsti klúbbur í heiminum. Ég átti gott spjall við forráðamenn félagsins og þá hafa danskir leikmenn sem hér hafa verið borið Celtic góða sögu. Stuðningsmennirnir eru frábærir og ég get ekki beðið eftir að fá að hjálpa liðinu í titilvörninni og í meistaradeildinni," sagði Gravesen.