Vieira kominn til Inter á 6,5 milljónir punda

Patrick Vieira, fyrrum leikmaður Arsenal hefur gengið til liðs við Inter Milan frá Juventus á Ítalíu fyrir 6,5 milljónir punda og þar með bundið enda á vonir Manchester United um að fá leikmanninn.

Tilkynning um félagaskiptin kom snemma á miðvikudagsmorguninn í ítölsku kauphöllinni og var Vieira þar með staðfestur sem leikmaður Inter.

Juventus keypti Vieira sem er orðinn þrítugur á 13,75 milljónir punda frá Arsenal síðasta sumar en þurfti nú að selja hann á talsvert lækkuðu verði í kjölfarið á því að liðið var dæmt niður um deild á Ítalíu vegna hneykslismálsins svokallaða.