Boltinn grét undan mér

Luiz Felipe Scolari gerði létt grín að sjálfum sér sem leikmanni á blaðamannafundi í dag þegar hann talaði um að sjónarsviptir yrði af þeim Figo og Zidane þegar þeir leggðu skóna á hilluna á næstunni.

Scolari var sjálfur þekktur sem grjótharður varnarmaður og spilaði alla sína tíð með liðum í heimalandinu Brasilíu - oft við misgóðar aðstæður. "Það er skömm af því að leikmenn eins og Zinedine Zidane og Luis Figo séu brátt að hverfa af sjónarsviðinu og setjast í helgan stein. Þessir leikmenn eru listamenn með boltann og það er hrein unun að horfa á þá spila. Það er annað en ég sjálfur þegar ég var að spila - þá grét boltinn undan mér," sagði Scolari léttur í bragði.